Зөвлөгөө&Мэдээ

 Ларингит буюу төвөнхийн цочмог үрэвсэл

Төвөнх нь дуу авиаг үүсгэхээс гадна, амьсгалын доод замд агаарыг дамжуулах үүрэгтэй 

Ларингит нь ихэвчлэн 6 сартайгаас 3 нас хүртэлх нярай болон бага насны хүүхдүүдэд тохиолддог ба 6 –с дээш насны хүүхдүүдэд ховор тохиолддог. Хүүхдүүд ихэвчлэн намар, өвлийн улиралд өвдөх нь элбэг  . Охидтой харьцуулахад хөвгүүдэд арай илүү өвдөх нь их

Шалтгаанууд

Хамгийн түгээмэл шалтгаан нь дууны хөвч хавагнахад хүргэдэг вирусийн халдвар (RS вирус, параинфлуенза ,томуу гэх мэт) юм. Цөөн тохиолдолд  нян, мөөгөнцрийн халдвар, харшлын шалтгаанаар үүсэж болдог.

Вирус нь эхлээд хамар, хоолойг халдварладаг бөгөөд дараа нь амьсгалын дээд замын дагуу (хоолойн арын хэсэг) мөгөөрсөн хоолой, дууны хөвч, гуурсан хоолой хүртэл тархдаг. Халдвар даамжирч, мөгөөрсөн хоолойн доод хэсэг, төвөнх, дууны хөвчийг хавагнуулж, уушгинд агаар орох зайг нарийсдаг .

Шинж тэмдэг

Үндсэн шинж тэмдэг нь "хуцуулж ханиалгах", дуу хоолой  сөөнгө болох юм. Шинж тэмдгүүд нь ихэвчлэн шөнийн цагаар улам дордож амьсгал авахад төвөгтэй болж хүндэрдэг учраас эцэг эхчүүд өвчний талаар мэдээлэлтэй байх нь чухал 

Шинж тэмдгүүд нь ихэвчлэн аажим аажмаар эхэлдэг бөгөөд хамар битүүрэх, шингэн нус гарах зэргээр эхэлдэг. Хуцуулах ханиалга , дуу сөөнгөтөх шинж эхэлснээс хойш 12-48 цагийн дотор амьсгалахад хүндрэлтэй болж, улам дордож болно.

Ихэнх хүүхдүүд 38°C - 40.5°C хүртэл халуурдаг. Вирусийн гаралтай халууралт нь хор нөлөө багатай байдаг учир асран хамгаалагчид сандралгүй халуун бууруулах эмийг биеийн жинд тохирсон тунгаар хэрэглэх шаардлагатай 

Хэрвээ хүүхэд хангалттай хэмжээний шингэн ууж чадахгүй бол шингэн алдалт үүсч болно.

Шинж тэмдэг эхэлснээс хойш гурав хоногийн дараа эсвэл халууралт арилах хүртэл хүүхдүүд халдвартай гэж үзнэ. Үүсгэгч агаар дуслын замаар халдвартай хүүхдийн ханиах найтаах үед тархана.

Та хэзээ эмчид хандах шаардлагатай вэ? 

1. 38,5 дээш халуурах , халуун бууруулах эмэнд сайн буурахгүй байх 
2. 3 хоногийн дараа халууралт намдаж, шинж тэмдгүүд сайжрахгүй байх
3. Амьсгал авахад саадтай , төвөгтэй болох
4. Хоол , шингэн уух зүйлээ ууж идэж чадахгүй болох
5. Дуу авиа гарахгүй болох
6. Арьс цонхийж цайх, хөхрөх
7. Биеийн байдал дордох, хүндрэх 

 Гэртээ авах арга хэмжээ

1. Бүлээн шингэн ердийнхөөс илүү уулгах
2. Халуун 38,5 дээш үед халуун бууруулах эм хэрэглэх / парацетамол, ибупропен тохирсон тунгаар/
3. Хурц үнэр гаргахгүй байх / Арц, хүж уугиулах,  үнэртэй ус цацах, дам тамхины утаа гаргах,  сонгино шарах, хуушуур хайрах, ариутгалын үнэртэй бодис ашиглах/
4. Хүүхдийг удаан хугацаагаар уйлуулахгүй байх
5. Хэт их гүйлгэж амьсгаадуулахгүй аль болох тайван байлгах
6. Гэрийн агаарыг чийглэг байлгах
7. Харшил төрүүлэгч хүнс идүүлэхгүй байх / бүх төрлийн чихэртэй ундаа, цитрусын төрлийн жимс, шоколад, халуун ногоо, даршилж нөөцөлсөн хүнс/
8. Хэт хүйтэн эсвэл халуун хоол хүнс өгөхгүй байх
9. Ихэвчлэн шөнийн цагаар хүндэрдэг учир 1 өрөөнд хамт унтах

 Урьдчилан сэргийлэх 

• Зуны улиралд нар, ус , агаараар чийрэгжүүлэх
• Улирлын томуугийн вакцинд хамрагдах
• Витамин Д насанд тохирсон тунгаар тогтмол уулгах
• Гарыг тогтмол угаалгаж хэвшүүлэх

                                                                                               Зөвлөгөөг бэлтгэсэн: Хүүхдийн их эмч Б.Оюунсувд

Powered by Froala Editor